|
Presentacion:
Vaicí un jòc de taulèr absoludament genial, amb tot çò que cal per agradar a tota la familha: un tèma
conegut e passionant, un polit taulèr amb imatges d'epòca, e de mecanismes de jòc fòrça simples mès que
cal maitas partidas per los mestrejar plan coma cal.
|
|
|
La tòca de cada jogaire (de 3 a
6) es de far lo torn del mond en mens de 80 jorns. Lo torn del mond consistís en una seguida d'etapas
(Londras, París, Brindisi, Suèz, eca.); entre cada etapa cal far servir 1, 2 o 3 cartas de viatge per
poder desplaçar son peon. A cada carta correspond un nombre de jorns. Per exemple, per anar de Londras a
París cal far servir doas cartas. Se un jogaire fa servir una carta "4" e una carta "5" per desplaçar son
peon, aurà acumulat atal 9 jorns de viatge. Plan solide, val melhor far servir cartas amb una valor petita
que cartas amb una valor granda. A la fin del torn del mond, lo jogaire que son total de jorns de viatge
es mai petit a ganhat. Simple e eficaç.
|
|
|
Çò agradiu per nosaltris
grognards es que l'azard ten una part minima dins lo debanament del jòc. Lo còr del mecanisme del jòc, e
çò vertadierament genial, es que los jogaires causisson las cartas amb sas fàcias visiblas e non
escondudas: a cada novèl torn de jòc, se tiran 4 a 6 cartas de la pila de cartas non utilizadas que se
plaçan costat visible sul taulèr. A cada carta correspond una accion particulara: jogar en prumèr lo còp
que ven, tirar una carta "accion", desplaçar lo peon negre, recebre una pèça d'aur... (las cartas accion
permeton d'unas accions un pauc especialas, las pèças d'aur permeton de crompar cartas, lo peon negre
balha una penalitat de 2 jorns al peon que se tròba sus la meteisha etapa). A cada torn, i a atal un
dilèma terrible entre causir una carta de valor petita e causir una accion que seriá utila per avançar mai
aviat cap a la darrèra etapa...
Avèm faitas un fum de partidas amb los nens e amb los grands, e lo jòc agradèc a totis. De mai, cada
partida s'acaba amb los peons fòrça prèps en quant al nombre de jorns emplegats per arribar al cap del
camin. Cada còp, es lo jogaire que faguèc las decisions mai bonas al moment de causir o lo que prenguèc
los risques mai calculats que ganhèc.
Ressorças: Lèu-lèu!!
Ressorças sul malhum: Per ara, n'en coneishèm pas cap.
|
|
