Los precursors del fenomèn ludic se trapan demest los jòcs coneguts jol nom de jòcs de taulèr, que constituisson una de las manifestacions mai singularas e representativas de tota civilizacion. En evolucion constanta despèi sas formas mai antigas, coma lo Gò, l'ancian jòc reial d'Ur (que las règlas ne'n son perdudas), las Damas o las divèrsas variantas dels Escacs, los jòcs de taulèr poirián èsser considerats, en tota justícia, coma lo nucli e la raiç de totas las altras formas de jòc, que n'en derivan d'un biaish o d'un altre.

Poiriam considerar que los jòcs de taulèr son totis aquelis que an en comun lo fait de se jogar sus un airal delimitat -que sonam taulèr- qu'i posam o desplaçam un ensem d'elements simbolics -que sonam peons o pèças-, en acòrdi amb unas règlas establidas precedentament. Còp e còp los punts comuns s'acaban aquí çaquelà, alavetz auèi lo dia i a una varietat bèla de jòcs de taulèr, que se diferéncian entre elis pas son que pel tèma -n'i a de competitius e de cooperatius, d'estrategics e de diplomatics, de guerrièrs e de pacifics, de dos e de multiples jogaires, etc.- mès tanben pels mecanismes que regisson lo jòc. Alavetz, al costat dels que lo debanament d'una partida i es regit per mecanismes classics d'azard, coma los daus, i a tot un repertòri de jòcs que lo sieu debanament es regit pel mejan de cartas representant opcions multiplas; aquest darrièr genre es a aquerir totjorn mai d'importància. Atal meteish, n'i a que descartan totalament lo factor d'azard e que fisan lo cors de la partida son qu'a l'encadenament de las accions dels jogaires.

Dins aquestas paginas vos presentam -coma dins tot lo demai del siti, de fait- res qu'aquelis jòcs que practiquèrem mai sovent, o alara d'unis d'aquelis que aguèron mai de difusion o d'acceptacion; solide que n'i a fòrça, fòrça mai. Finala esperam que, amb las nòstras paginas, vos ajudarem e incitarem a dintrar per de bon dins aquest element indefugible e prigond de l'esséncia umana (e mai fusquès mantunis còps rebaishat per la "cultura oficiala"): los jòcs.